Tu unq'a yaab'e' palyak kan, inuk' tib' tib'axa jolol unq'a qitz'in qatzik uva' katil kuxh mox tzaajkat ti' mox iyolat ve't itzojpisal iq'axsal u Bibliae' tu unq'a iyolb'ale', tan ma'tik itzojpu ve't u Instituto Lingüístico de Verano (ILV) tiꞌ iq'axsal u Ak' Tzaq'ite' tu unq'a yolb'ale', uva' ech kuxh sti'e' q'a el ve't tu Guatemalae', as tanb'a'l kan kuxh ve't u Biblia tuk' u Ak' Tzaq'ite'. Esti'e', ilchoj ve'te' uva' vitenam u Tiixhe' nikat isa'vit ve't uma'l u Bibliae' sti' uva' tz'ajel chit ve'te', aq'al uva' la mox pal ve't stuul kam ni tal viyol u Tiixhe' tu Ak' Tzaq'ite' as tuk' tu O't Tzaq'ite' tu yolb'al Maya'.
Xe't ve't u A.E.C.M. aq'onvo tuk' o'va'l uxhchil ti' u q'axsa'myole', uva' ye'lik umaj locho'm uva' puaaj nik mox ik'ul sti', pet sivatz kuxh tuk'a taanxelal mox xe't aq'onvoj. Nikat mox ik'ulpu chusiib'-txumb'al ti' taq'il-yol as tuk' ti' inuk'pu itz'ib'al-tz'ib' unq'a yolb'ale' uve' ni mox iyolb'el tu junun atinb'al tu kajayil nimla tx'ava' tename'. Tul pal ve't unq'a yaab'e' mox inuk' ve't tib' sb'a'n, mox teesa ve't tu'uaal u A.E.C.M., tan ilchoj ve'te' uva', asoj ye' kuxh la taq'ik tib' ootziloj te u ijlenaale', umaj chit lochb'ale' ye' la uchik ijajat te ka'ta nuk'ich-aq'on, (ONGs). Pal ve't jatva'l yaab' stuul b'ex ik'ujb'a' ve't tib' unq'a vee' achvali as o'va't tenam toksa ve't tib' sk'atz as laval oonkat ve't tachul uve' ni q'axsalkat ve't u O't Tzaq'ite' cheel tu unq'a yolb'ale' Maya'.
Ech kuxh titz'eb' u AECM Guatemala stitz'eb'e', ti' teq'ol viyol u Tiixhe' tu junun unq'a tename' niyolb'en viyolb'aleꞌ, ti' ib'anchu u titz'ab'al u Kub'aal Tiixhe' alel kan sta'n, aq'al uva' kajayil unq'a uxhchile' la oon viyol u Tiixhe' tiq'ab' tu viyolb'ale'. As echkole' unpajte ilochon k'atz u chusb'ale', ti' iyak'insal itxakonsal unq'a yolb'ale' ni yolb'el tu junun atinb'al, ti' isik'lele' as itz'ib'ale', aq'al uva' ye'l ve't uxhchil la ib'ane' uva' ye'l ichusb'al echkole' tu yolb'ale' Kaxhlan as tu yolb'ale' Ixil, iyolb'al Maya'.
AECM, a' uma'l u nuk'ich aq'on uva' jit ti' puaaj ni taq'onvukat, pet ta'n kuxh vilochb'al unq'a paxsan-yol Tiixhe' tuk' unq'a qitz'in qatzike' tu unq'a tostiixhe' tu Estados Unidos tu tzaaeb'alkajiq', as vilochb'al unq'a ilol isuuchil u Nuk'ich aq'one' AECM as unb'iitoj vilochb'al unq'a ixeeol tenam u Tiixhe' nuk'elaj tib' tu tenama' Na'b'a' katil niq'axsalkat viyol u Tiixhe', u O't Tzaq'ite'.
